كلك تغيَّرت

 

 

 

 

تزعل تضيق تنفلق ما همني وهمَّك

ما دمت صادق معاك وصافي النيه

مدري تغليت مدري عاذلي سمِّك

كل اللي أدريه أوضاعك ماهي هيَّه

ما عدت تشتاق لي وماعدت أنا همِّك

وأمست مشاعرك في حبي رماديه

تصدني بالجفا وساعة بثقل دمِّك

وش فيك أصبحت تهواني بمزاجيه

حتى الكلام الحلو ما ينطقه فمِّك

صارت سوالفك وياي انفعاليه

نسيت حالتك يومي بلهفتي آضمك

ترجف عظامك وعينك شبه مغميه

نسيت قلبٍ بصادق نيته لمِّك

والحين لا جا يلمِّك قلت ما فيَّه

نسيت صدرٍ يرد الروح لا شمِّك

وشلون صارت ضلوعه منك منفيه

ما ذقت طعم الدفا من بعد حضن أمك

يا ناقص العقل إلا من الضلوع ذيه

كلك تغيَّرت حتى العطر في كمِّك

لا هو بعطري ولا أهواه مو ليَّه

أقول وأحلف بربي .. الذي تمِّـــــك

دامك تغيرت عني ميه في الميه

راح آتغيَّر وأقسِّي القلب وآسمِّك

يحل لي القتل دام أقدر على الديَّه