الصواب إنك معي دايم صواب
بك رجاحة عقل في رقة صغير
وفيك عزة نفس ترقى للسحاب
من غرورك ودها تحتك تسير
مظهرك لو أوصفه أكتب كتاب
وجوهرك كالماس جذاب وعسير
دام شعرك ليل والغُرَّه حجاب
والجبين يعانقه حاجب خطير
ما يلام اللي غلبه الإنجذاب
الفراش يموت في البدر المنير
في عيونك سحر أعجب من عجاب
العصي وهو العصي فيها أسير
رعشة أهدابك تسبب اضطراب
تجعل المبصر رغم أنفه ضرير
من رموش(ن) طعنها مثل الحراب
للجفون اللي أثرها مستطير
كم قلوب(ن)قاسية أمست عِطاب
وانتهت في بند مجهول المصير
يا وجون(ن) استحى حَب الشباب
لا يشوِّه بشرة الطفل الغرير
للحيا حُمرة كما لون الخضاب
في خدودك تحرج الورد النضير
كيف حلو الشهد في لاماك ذاب
والشفق فيها ومنها يستجير
إن تبسمتي انتشى وردك وطاب
وان تضايقتي لمحنا الزمهرير
والقوام اللي بلغ حد النصاب
كل شي(ن)فيه جذاب ومثير
كاعب الأتراب أتعبت الكعاب
بينك وجيلك ترى الشاسع كبير
كلهم مخلوق من ماي وتراب
و انتي وحدك بس من مسك وحرير
