حزات يا قلب لك زلات ما ترحم
وهقتني في الهوى وابليتني بلوى
من بعد شرب العسل جرعتني العلقم
وش ذنبي أثمل بغصات الهوى واروى
يا قلبي هذا زمن فيه الضمير أبكم
والعقل أعمى تقوده للعمى نزوى
ولَّى زمان الوفا .. هذا زمان الكم
قلوب تمسي جريحة وتصطبح تهوى
مغرم تولَّع بمغرم وانتهى مغرم
لعبة وفيها المشاعر كالورق تطوى
ياما نصحتك وقلت أبعد بعيد تسلم
لا طحت يا خافقي ما تنفعك شكوى
بدَّلت ليل السلا غم وهجوس وهم
وأضنيت حالك ما بين الآه والنجوى
ومشيت في درب شايك مظلم ومبهم
تقول تقوى وأنا ادري عنك ما تقوى
هقيت وقتك مثل أول يقول لك سَم
صدقت زيف الغرام ولذة النشوى
أمسيت ترجف ولا كنه بعروقك دم
تندب زمانك وتلعن حظ ما يسوى
الحين تنشد لجرحك في الهوى بلسم
يا قلب محد(ن) رماك فـ/ سكته عنوى
